pungaw.

sa mga mortugong pagmati
na nagkasurupugan, na pigsusuruway ang hiling
ta kung ano man na rason kang pagmati na bagul na daa,
na pirmi na lang nagkakairinot ang mga taon saka mga dominggo
sa pag agi, sa pag sangli kaya dagos pigtatarakig na
sa lipot kang rayo sagkod mga ngirit
asin urulay sa tahaw kang pagpangudto,
na may tarom ng kaibanan, kang mga pagmawot
na pigtatarago na lang siring kang raot na alahas.

mortugo, mortugo daang pagkamoot
na tinutubuan na ning mga ugat kang mga tanom,
na dai man mapundo sa pagtalubo asin pagtahob
sa pagkamoot. sa pagkamoot
na yaon lang, na nagmamawot
man lang ngani talagang giromdomon;
para mag imbong, mag init
sagkod mamati liwat ang pungaw,
ang paghanap sa kugos
asin init kang palad pag minadutaan
kabali na ang girok sa paghinghing,
asin kugos na siring man sa dalan pauli.